Banku Nasional Komérsiu Timor-Leste (BNCTL), Sesta-feira ne’e, realiza Serimónia Lansamentu Primeira Pedra ba Konstrusaun Edifísiu Foun BNCTL iha Munisipiu Laútem, Postu Lospalos Vila, Suku Fuiluro.

Iha intervensaun, Prezidente Komisaun Ezekutivu, Sr. António Vítor agradese ba Prezidente Autoridade Munisípiu Laútem, Autoridade Lokál, Polisia Nasionál Komérsiu Timor-Leste (PNTL) no parte hotu ne’ebé mak envolve iha projetu ida ne’e.

Nia informa, objetivu hosi expansaun ne’e atu mellora asesibilidade servisu banku nian ba komunidade hodi fó atendimentu ne’ebé dignu no konveniente liu ba kliente sira.

Iha biban ne’ebé hanesan, agradese ba opoiu Reprezentante Asionista Úniku BNCTL, Sua Exélensia Vise-Primeiru-Ministru, Ministru Koordenadór Asuntus Ekónomiku, no Ministru Turizmu no Ambiente, Sr. Franscisco Kalbuady Lay no Parlamentu Nasionál ne’ebé aloka orsamentu mai banku hodi kapasita kondisaun hodi servi kliente sira di’ak liu-tan.

Tuir kontratu ne’ebé mak iha, konstrusaun ba edifísiu foun ne’e sei termina iha fulan sanulu resin ida (11) no kompañia sei esforsu hodi ezekuta, afirma Almeiro Neves Freitas, Enjeneiru Kompañia China Shandong International.

Iha sorin seluk, reprezentante Autoridade Munisipiu Laútem, Sr. Siborsiu dos Santos agradese ba BNCTL ne’ebé hari ona edifísiu foun hodi fó atendimentu ba komunidade Laútem no lori dezenvolvimentu ekonomia ba populasaun sira.

Serimónia lansamentu ne’ebé realiza iha loron 14 Fevereiru ne’e hetan partisipasaun hosi Autoridade Lokál, reprezentante Konsellu Nasionál Veteranus, PNTL, reprezentante Igreja, Komunidade no funsionariu BNCTL rasik.