Oecusse, 10 Abril de 2025 – Banku Nasionál Komérsiu Timor-Leste (BNCTL, sigla iha Português) reprezenta hosi Divizaun Operasaun, Sr. Marsizio de Oliveira halo aprezentasaun kona-ba servisu Banku nian hanesan Internet/Mobile Banking BNCTL iha ámbitu serimónia diseminasaun informasaun pagamentu dijitál ne’ebé organiza hosi Banku Sentral Timor-Leste (BCTL).

Objetivu hosi eventu ne’e atu fahe informasaun ba públiku, liu-liu komunidade iha Oecusse kona ba sistema pagamentu dijitál ne’ebé permite kliente sira halo tranzasaun seguru liu no la presiza lori osan cash.

Internet/Mobile Banking BNCTL hanesan servisu BNCTL nian ne’ebé permite kliente sira halo tranzasaun online gratuitu hanesan transférensia osan entre konta BNCTL, konsulta saldo, asesu servisu banku iha kualker fatin no kualker momentu no bele asesu ba informasaun konta nian ho lais liu.

Atividade ne’e hetan partisipasaun hosi banku komersiais sira hanesan Bank Rakyat Indonesia (BRI), Bank MANDIRI no fintech hanesan MOSAN, T-OAN no programa ne’e mós hetan partisipasaun hosi reprezentante Divizaun Planu no Komersializasaun no Divizaun IT BNCTL.