Aileu, 21 Outubru 2025 – Banco Nacional de Comércio de Timor-Leste (BNCTL), S.A liuhosi divizaun Planu Negósiu no Komersializasaun (PNK) promove inkluzaun finanseira no literasia bankária ba autoridade lokál, funsionariu munisipál, profesór no komunidade sira iha munisípiu Aileu.

 

Objetivu hosi atividade ne’e hodi fahe informasaun konaba produtu no servisu banku nian hanesan tipu konta iha BNCTL, depózitu, kréditu, servisu remitensia, servisu movel, servisu dijitál sira hanesan Internet/Mobile Banking, Ajente Banku, servisu sosiais no seluk tan.

 

Iha intervensaun, reprezentante Prezidente Autoridade Munisípiu Aileu, Sekretária Munisipál Planeamentu Sra. Victoria Mesquita do Rego agradese ba BNCTL ne’ebé koordena ho munisípiu hodi partilla informasaun banku nian atu nune’e autoridade lokál, funsionáriu munisipál bele entende hodi asesu ba produtu banku no bele hatutan mos ba sira nia komunidade iha kada suku.

 

Entretantu, iha atividade ne’e partisipante sira hatudu interese no ativu hodi koloka kestoens konaba asesu ba kréditu, fasilidade konta iha BNCTL, uza aplikasaun dijitál, inklui preokupasaun ne’ebé sira nia komunidade hasoru iha kada suku, no iha fatin hanesan ekipa BNCTL fó kedas resposta no solusaun. Iha sorin seluk, ekipa mos halo kedas atendimentu ba partisipante sira ne’ebé hakarak rejista ba Internet/Mobile Banking.

 

Sosializasaun ne’e hola parte iha planu estratéjiku BNCTL nian hodi reforsa konfiansa komunidade iha sistema finanseiru nasionál no garante Timor oan hotu asesu ba servisu bankáriu ne’ebé seguru, modernu no asesível.