Banku Nasionál Komérsiu Timor-Leste (BNCTL), reprezenta husi Jerente Divizaun Planeamentu no Komersializasaun, Sr. Mariano de Deus, iha loron Sábadu, 29 Marsu, partisipa serimónia inaugurasaun dormitóriu semináriu Canossiano SACROJES iha Hera, ne’ebé hetan apoiu hosi BNCTL hodi finaliza obra ba konstrusaun dormitoriu ne’e.

Iha intervensaun, Jerente Divizaun Planeamentu no Merkadu, Sr. Mariano de Deus informa katak apoiu ne’ebé BNCTL oferese ne’e tama iha planu prioridade banku nian ne’ebé kada tinan fó tulun ka apoiu ba maluk sira ne’ebé nesesita liu. No tinan kotuk banku halo selesaun ba proposta ne’ebé tama no konsidera Semináriu Canossiano SACROJES mak merese liu hetan apoiu refere hodi konstroi dormitoriu ba seminarista sira. Nia konsidera, apoiu ne’ebé banku oferese hanesan domin ida ne’ebé ita ema tenke fó no fahe ba malu.

Nune’e, Pe. Nivio Correia Lebre FdCC hato’o agradesimentu ba BNCTL ne’ebé ho laran luak fó apoiu hodi halo konstrusaun dormitoriu ba seminarista sira ne’ebé kada tinan númeru aumenta. Konsidera ida ne’e nu’udar investimentu di’ak ba ita nia oan seminarista sira hodi nune’e sira bele serbi ba ita nia uma kreda iha Timor-Leste.

Eventu ne’e partisipa hosi ekipa Divizaun Planeamentu no Komersializasaun BNCTL, benfeitores, banda no komunidade sira.