Díli, 30 Janeiru 2025 – Banco Nacional de Comércio de Timor-Leste (BNCTL) hala’o serimónia bensãu atu lansa espasu foun ba Divizaun IT iha Colmera. Serimónia ne’e hala’o husi Padre Júlio Mota, SDB, ho partisipasaun husi líder sira iha BNCTL no ekipa téknika hotu.

Espaçu foun ida ne’e sei ser parte importante ba BNCTL nia estratéjia transformasaun digital, ne’ebé fó reforço ba infraestrutura tecnológica atu asegura seguransa, eficiência no inovasaun boot liu tan iha operasaun bankária. Aumentu ida ne’e fó prova BNCTL nia kompromisu atu kontinua fo servisu di’ak liu ba kliente, hodi halo banku digital ne’ebé liu tan lalais, konfiável no seguru.

Iha okaziaun ida ne’e, Prezidente Komisaun Ekzekutiva, Sr. António Vítor, fó hatene katak BNCTL sei kontinua investe iha teknolojia atu sustenta nia dezenvolvimentu. Nia subliña katak espasu foun ba Divizaun IT sei sai sentru inovasaun BNCTL, hodi fó reforço ba seguransa siber, moderniza sistema sira, no dezenvolve servisu bankária digital foun sira.

Serimónia ne’e mos partisipa husi gerente sira husi Divizaun, Xefi Unidade Espesiálizadu, Profisionál IT no funsionáriu banku hotu, ne’ebé hasai kontenti ho ambiente servisu foun ida ne’e. Aumentu ba Divizaun IT sei facilita operasaun, bele hadi’ak fluxo servisu iha laran, no halo implementasaun ba servisu bankária digital foun sai lalais liu tan.

Ho iniciativa ida ne’e, BNCTL sei kontinua fó impaktu boot iha Timor-Leste setor bankária, ajusta ho dezenvolvimentu teknolojia no asegura experiénsia bankária seguru, eficiente no fó prioridade ba kliente sira.