Díli, 27 Juñu 2025 - Banco Nacional Comércio Timor-Leste (BNCTL), S.A, reprezentante hosi Xefe Divizaun Operasaun, Sr. Zelio Amaral, Sesta-Feira ne’e, partisipa nu’udar oradór iha programa Youth Co-Lab, iha ámbitu Feira-Produtiva ne’ebé organzia hosi Alumni Parlamentu Foinsa’e Timor-leste (APFTL), ho tema “Hametin Kresimentu Ekonomia Ne’ebé Inkluzivu”, iha Fundação Oriente, Bairro Grilhos.

 

Durante intervensaun, Xefe Divizaun Operasaun, Sr. Zelio Amaral destaka papel krusiál banku nian iha promosaun ba diversifikasaun ekonómika iha Timor-Leste, tuir vizaun instituisaun nian hanesan haluan asesu servisu bankária no finanseiru ba kliente sira liu-hosi rede ajente banku hodi fasilita kliente no komunidade iha áreas remotas, fó atendimentu ho kustu razoavel liuhosi kréditu agrikola, negósiu hodi diversifika ekonómia rai laran. Refere mos kumprimisu banku nian hodi presta servisu ho exélensia, amigavel no lais liu, expande kréditu no depózitu hodi kontribui ba dezenvolvimentu ekónomia rai laran.

 

“Inisiativa no asaun mak sai nu’udar xave diversifikasaun ekonómika iha País ne’e. Entretantu, ita labele depende de’it iha setór mina no gas”, afirma xefe Divizaun Operasaun, Sr. Zelio Amaral, ne’ebé subliña importánsia hosi diversifikasaun ekónomika hodi dezenvolve setór produtivu sira seluk.

 

Durante dialogu ne’e mos, partisipante sira koloka mos kestaun relasiona ho asesu ba servisu no produtu banku nian, konsidera hanesan meius importantes hodi expande sira nia negósiu.

 

 

Inisiativa ne’e hetan partisipasaun hosi reprezentante governu, instituisaun akadémika, instituisaun finanseira, parseiru dezenvolvimentu, ajénsia internasionál no emprezariu sira, inklui reprezentante foinsa’e produtór hosi munisípiu.