Díli, 13 Marsu 2025 - Banku Nasional Komérsiu Timor-Leste (BNCTL) hamutuk ho Institutu Nasional Seguransa Sosial (INSS), asina akordu kona-ba pagamentu primeira faze pensoens sosiais ba benefisiárius Terseira Idade no Ema ho Defisiénsia ne’ebé sei hahú iha loron 17 Fulan Marsu.

Iha intervensaun, Sua Excia. Ministra Soliedariedade Sosial no Inkluzaun (MSSI), Sra. Verónica das Dores informa, pagamentu hosi parte Leste sei hahú hosi Munisípiu Laútem, rai-klaran hosi Covalima, oeste hosi Munisípiu Ermera, inklui Díli no RAEOA, no ba primeira faze ne’e sei halo mós pagamentu retroativu ba munisípiu neen (6) ne’ebé la konsege selu iha kuarta trimester iha tinan 2024. Iha faze dahuluk ne’e, totál benefisiáriu ne’ebé sei simu pensaun sosiál hamutuk 107.786 ho total orsamentu $32.780.541,00

Iha biban ne’ebé hanesan, Prezidente Konsellu Administrasaun BNCTL, Sr. Januario da Gama informa, banku nia pozisaun prontu no konfirma komitmentu hodi responsabiliza pagamentu tuir akordu ne’ebé selebra ona no BNCTL kompromete hodi desloka ba áreas remotas hodi atende benefisiárius hotu-hotu ne’ebé naran iha ona lista.

Serimónia ne’e marka prezensa hosi Prezidente Komisaun Ezekutiva BNCTL, Sr. Marcelo da Cruz Carvalho, Prezidente INSS, Jerente Divizaun Operasaun BNCTL, Sr. Zelio Amaral, inklui tékniku hosi INSS no BNCTL.