Prezidente Konsellu Administrasaun Banku Nasional Komérsiu Timor-Leste (BNCTL), Sr. Januario da Gama, Segunda-feira ne’e, partisipa serimónia abertura atribuisaun pagamentu subsídiu Terseira Idade no Ema ho Defisiénsia iha Gleno, Ermera.

Iha intervensaun, Prezidente BNCTL agradese ba konvite hosi Institutu Nasional Seguransa Sosial (INSS) ne’ebé konvida ona parte banku hodi partisipa no iha biban ne’ebé hanesan solisita ba inan-aman, avo sira no Ema ho Defisiénsia atu utiliza subsídiu refere ho di’ak no solisita atu sira mós hakbesik aan ba banku hodi loke konta no rai osan.

Iha oportunidade ne’ebé hanesan, Prezidente INSS, Sr. Arlindo Pinto informa pensaun sosial ne’e hanesan konsiderasaun estadu nian ba inan-aman, avo sira hanesan erói moris hodi valoriza no dignifika sira nia moris. Salienta mós katak, pagamentu tinan ida ne’e ho kategoria diferente tuir alterasaun dekretu lei ne’ebé hetan ona aprovasaun. Atu termina, solisita ba benefisiáriu sira atu uza osan ne’ebé estadu oferese ho di’ak.

Serimónia abertura ne’e partisipa hosi Autoridade Lokal, Polisia Nasional Timor-Leste (PNTL), ekipa tékniku INSS no BNCTL rasik no totál benefisiárius iha Ermera hamutuk 10.999.