Iha loron 20 Marsu 2025, Prezidente Konsellu Administrasaun no Prezidente Komisaun Ezekutiva foun Banku Nasional Komérsiu Timor-Leste (BNCTL), simu pose hosi Reprezentante Asionista Úniku BNCTL, Sua Exélensia Vise-Primeiru-Ministru, Ministru Koordenadór Asuntus Ekónomikus,Ministru Turizmu no Ambiente, Sr. Franscisco Kalbuady Lay, no hetan testamuña hosi Governadór Banku Central Timor-Leste (BCTL), Sr. Helder Lopes, iha Pavillaun VIP Sentru Konvensaun Díli, Merkadu Lama.
Iha serimónia ne’e, Sr. Januario da Gama nomeadu nu’udar Prezidente Konsellu Administrasaun hodi lidera Konsellu Administrasaun iha orientasaun estratéjika, asegura governasaun korporativas ne’ebé forte no superviziona dezempeñu jerál banku no jestaun risku.
Eleitu Sr. Marcelo da Cruz Carvalho nu’udar Prezidente Komisaun Ezekutiva, ne’ebé sei responsabiliza operasaun diária iha banku, implementa inisiativa estratéjika no dudu kresimentu sustentável.
Iha intervensaun, Governadór BCTL, Sr. Helder Lopes fó parabéns ba emposadus no husu ba estrutura foun atu tau matan didiak ba BNCTL. Sr. Helder mós agradese Prezidente Konsellu Administrasaun sesante Sra. Lúcia da Cruz Flor no Prezidente Komisaun Ezekutiva Sesante Sr. Antonío Vítor ba sira nia kontribuisaun iha dezenvolvimentu BNCTL no solisita nafatin atu sira kontinua kontribui iha fatin ne’ebé de’it sira hakna’ar aan iha futuru
Governadór ne’e husu ba BNCTL atu kontinua espande kréditu hodi fó apoiu ba setór privadu, ba populasaun hotu hodi hadi’a sira nia moris. Enkoraja hodi kontinua promove dijitalizasaun iha servisu finanseiru, asegura inkluzaun finanseira atu ema hotu asesu, liu-liu komunidade iha áreas rurais, emprezas mikro, ki’ik no médiu tanba sira mak sustenta ekonomia nasaun.
Iha oportunidade ne’e, Governadór BNCTL destaka pilar fundamentál haat (4) BCTL ne’ebé sei implementa hamutuk ho BNCTL hanesan tuir mai ne’e:
- Fó finansiamentu ba Dezenvolvimentu;
- Promove sistema pagamentu nasionál no promove cashless liu 60%;
- Fasilita asesu finansiamentu no solisita atu promove literasia finanseira;
- Moderniza Sistema finanseiru nasionál.
Iha Diskursu, Reprezentante Asionista Úniku BNCTL, Sua Exélensia Vise-Primeiru-Ministru, Ministru Koordenadór Asuntus Ekónomikus, Ministru Turizmu no Ambiente, Sr. Franscisco Kalbuady Lay informa katak governu liu-hosi MAKE nia polítiku atu apoia prinsipiu governasaun di’ak, transparensia hodi partisipa iha dezenvolvimentu ekonomia ida ne’e. Nia mos relata katak povu mak sai nu’udar sentru dezenvolvimentu iha sistema finanseiru no solisita ba emposadus sira atu ukun ho transparensia hodi hetan konfiansa hosi populasaun tomak iha sistema finanseiru ida ne’e.
Atu termina, nia mos agradese ba Prezidente sesante sira nia dedikasaun no kontribuisaun ne’ebé lori ona susesu ba BNCTL no husu ba ekipa BNCTL atu servisu hodi hadi’a nasaun no sidadaun sira nia moris.