Enkontru Ekonomista Senior Banku Mundial no BNCTL Loron, Sesta 20 marsu 2020 Ministru Koordenador ba Assuntos Ekonómikus (MCAE sigla portuges), Sr. Fidelis Manuel Leite Magalhães nudar mos Ministru Reforma Lejizlativa no Asuntu Parlamentár (MRLAP), halo enkontru ho ekonomista senior husi Banku Mundial, Sr. Pedro no mos Konsellu Administrasaun Banco Nacional de Comércio de Timor-Leste (BNCTL) iha Gabinete, hodi kolia kona-ba impaktu ekonomia Timor-Leste, bainhira hasoru Coronavirus disease 2019 (COVID-19) tama iha Timor Leste. “Ita tenke iha planu tenke aprezenta ba governu iha pakote, para ita bele halo rekoperasaun ba setór ekonomiku iha rai laran, imi hatene, karik moras iha Timor-Leste nia impaktu makas tebes ba setór ekonomiku, hanesan ba area Turismu, Ótel no mos Restaurante, entaun bele afeita mos ema balun sei lakon servisu, nee mak ita tenke prepara ba planu atu bele rekopera fila fali,” dehan Ministru Fidelis. Alende ida ne’e, BNCTL nia prezensa iha munisipiu hotu, karik iha estadu emerjensia atu ba foti osan iha ne’ebé, ne’eduni tenke planu bainhira ema balun ho kartaun ATM atu ba foti osan, iha ema balun moras tiha ona, depois liman kona karik, ema seluk ba mos sei tauk atu ba hasai osan, ne’eduni tenke iha planu ba preparasaun. “Nee mak ohin hau bolu BNCTL sira mai atu orienta sira preparasaun ba situasaun sira nee. Hau enkontru ho BNCTL atu foti medidas nesesariu sira para atu bele fasilita ekonomia nasaun nian bele lao, bainhira ita tama iha situasaun emerjensia ruma,” dehan Ministru. Nune’e mos, Sr. Antonio Vitor husi Konsellu Administrasaun BNCTL hatete katak BNCTL hanesan banku uniku, ne’eduni sira mai atu informa ba iha Ministru Fidelis, tanba Ministru mak nudar asionista ba iha BNCTL. “Ami mai informa ba Ministru kona-ba estadu prepatativu sira ne’ebé ita presiza antisipa karik mosu Coronavirus disease 2019 (COVID-19) tama iha Timor-Leste, entaun ema hakarak ba foti osan, maibe ema labele basik malu, entaun medidas saida mak ita atu foti,” dehan Sr. Antonio.