Natarbora, 21 Outubru 2022

BNCTL nudar banku estatal no uniku banku komersial Timor-Leste nian kompremitidu atu disponibliza servisu bankaria ba komunidade sira residi iha area rurais no urbana iha teritoriu Timor-Leste.

BNCTL nia prezensa establesidu ona iha municipius sanulu resin rua (12) no Autoridade Espesial rua (2) mak Oecusse no Atauro ho total ajensias rua nulu resin hat(24), ATM +60 no POS +120, oferese servisus internet banking, remessas no servisu bankaria sofistikadu seluk disponível ohin no iha futuru.

To’o loron 19 Outubru 2022, BNCTL rejista hela depozitu husi publiku hamutuk tokon $567, ho kreditu ativu tokon $198 no jere hela ativu/assets tokon $704 ho klientes nebe nia serve + rihun atus hat. Banku ne’e jere husi 325 funsionarius, 100% Timor-oan.

BNCTL disidi atu estabelese ajensia foun iha Postu Administrativu Natarbora, area nebe iha potensia boot ba agrikultura, peskas, pekuaria ho eskala industrial mediu no bo’ot. . Estabelesimentu nee marka tan pasu importante ida ba servisu  bankaria iha area produtivu nee.

Embora BNCTL foin mak bele estabele ajensia iha Natarbora, maibé, BNCTL nia servisu durante ne’e kobre ona area rurais hotu-hotu atravez banka moveis no kanais servisu seluk.  Kontinuasaun estende nia rede, demonstra BNCTL nia komprimisu atu apoia programas Estadu ka Governu atu bele servi komunidade sira no promove mos inkluzaun finanseiras iha Timor-Leste.

Além-de Natarbora, BNCTL sei estabelese tan unidade ida iha Batugade iha 2022 no sei kontinua estabelese unidades seluk iha fatin hirak ne’ebé ekonomikamente viavél atu promove no aselera kresimentu ekonomia no moris diak ba komunidade Timorense no estabelese baze no kondisoeñs ba investor nasionál no internasional nebe investe hela ka intende atu investe iha setor produtivus no transformativus sira.

Ajensiq Natarbora sei kobre mós postu administrativus vizinus seluk hanesan:

  • Postu administrativu Soibada ho total populasaun 5,348
  • Postu administrativu Alas no Fatuberliu, Munisipiu Manufahi ho total populasaun 13,271
  • Postu administrativu Lacluta, Munisipiu Viqueque ho total populasaun 2,804

BNCTL konsidera katak, ho dezenvolvimentu area Kosta-Sul, sei fó oportunidade dezenvolvimentu integradu iha sétor agrikola, turizmu, negósiu, industria, pekuaria no investimentu komplementariu sira.  Espera, ho BNCTL nia prezensa iha Barique Natarbora sei kontribui siknifikativamente inisiativas dezenvolvimentu  ne’ebé estadu no governu halao hela, traça no sei  promove, ohin no iha futuru.

Unidade ne’e sei fo atendimentu ba servisus hanesan:

  • Mobilizaun depozitus
  • Konsedimentu kréditu
  • Fasilidade ATM no POS no servisu dijitalizadu seluk
  • Remessas lokal no internasional
  • Fasilita pagamentus subsidius sira ba benefisíarius ka G2P hanesan atendimentu ba idozus, salariu funsionarius subsidiu veteranus, , bolsa da mãe, no atendimentu seluk necessita iha futuru.
  • No prestasaun servisus bankária seluk.

Embora banku ne’e hanesan entidade komérsial ida, maibé, na’in ba banku ne’e mak Estadu. Nune’e, servisu saida deit mak banku ne’e fornese refleta servisu hirak ne’ebé Estadu no Governu presija disponibliza to’o iha baze.

“BNCTL moris ba imi buras ho imi, servi diferenti atu sai diferenti ”.

 

                                    **** remata****