Banco Nacional de Comércio de Timor-Leste (BNCTL), S.A liuhosi divizaun Planu Negósiu no Komersializasaun (PNK) promove inkluzaun finanseira no literasia bankária ba autoridade lokál, funsionarius munisipais, reprezentante Câmara de Comércio e Indústria de Timor-Leste (CCITL), profesores no komunidade iha munisípiu Manatuto Vila.

 

Objetivu hosi atividade ne’e hodi fahe informasaun konaba produtu no servisu banku nian hanesan tipu konta iha BNCTL, depózitu, kréditu, servisu remitensia, servisu movel, servisu dijitais hanesan Internet/Mobile Banking, Ajente Banku, servisu sosiais no seluk tan.

 

Iha intervensaun, Prezidente Autoridade Munisípiu Manatuto, Sr. Luís Inacio Henriques Fernandes agradese ba parte BNCTL ne’ebé koordena ho munisipiu hodi partilla informasaun banku nian atu nune’e autoridade lokál, funsionarius munisipais bele entende hodi asesu ba produtu banku no bele hatutan mos ba sira nia komunidade iha kada suku.

 

Entretantu, iha atividade ne’e partisipante sira hatudu interese no ativu hodi koloka kestoens konaba asesu ba kréditu, fasilidade konta iha BNCTL, uza aplikasaun dijitais, *inklui preokupasoens ne’ebé sira nia komunidade hasoru iha kada suku, no iha fatin hanesan ekipa BNCTL fó kedas resposta no solusaun. Iha sorin seluk, ekipa mos halo kedas atendimentu ba partisipante sira ne’ebé hakarak rejista ba Internet/Mobile Banking.

 

Portantu, sosializasaun ne’ebé realiza iha loron segunda-feira, 13 Outubru ne’e hola parte iha planu estratéjiku BNCTL nian hodi reforsa konfiansa komunidade iha sistema finanseiru nasional no garante Timor oan hotu asesu ba servisu bankárius ne’ebé seguru, modernu no asesível.