Dili, 09 Marsu 2026 – Banco Nacional de Comércio de Timor-Leste (BNCTL), S.A. partisipa iha Programa Orientasaun ba estudante foun sira iha Universidade da Paz (UNPAZ) ba Tinan Akadémiku 2026, hodi hato’o palestra ida kona-ba papél no responsabilidade banku nian iha Timor-Leste.

Reprezentante hosi BNCTL Sr. Joaquim dos Reis Martins introdúz ba estudante sira kona-ba importánsia hosi setór bankáriu iha apoiu ba dezenvolvimentu ekonómiku nasaun nian. Aprezentasaun ne’e destaka mós servisu finanseiru no bankáriu oioin ne’ebé BNCTL oferese, inklui oportunidade sira ne’ebé disponivel iha sistema bankáriu nia laran.

Atividade ne'e ho objetivu atu hasa'e estudante sira nia komprensaun kona-ba servisu finanseiru sira no enkoraja konxiénsia kona-ba literasia finanseira ba foin-sa'e sira. Liuhosi inisiativa sira hanesan ne’e, BNCTL kontinua hametin nia kompromisu hodi apoia edukasaun no promove inkluzaun finanseira iha Timor-Leste.

Partisipasaun BNCTL nian iha programa orientasaun ne’e refleta banku nia esforsu kontínua atu envolve ho instituisaun akadémika sira no kontribui ba dezenvolvimentu jerasaun futuru ne’ebé iha koñesimentu no konxiénsia finanseira.