Banku Nasional Komérsiu Timor-Leste (BNCTL, sigla iha Português), Sabadu, 8 Fevereiru, realiza lansamentu Website Foun iha Night Market, Timor-Plaza, ho objetivu hodi aprezenta plataforma foun ne’ebé fásil, lais, seguru no interativu liu ba públiku no kliente sira hotu.

Iha entrevista, Prezidente Konsellu Administrasaun, Lúcia da Cruz Flor hatete, website foun BNCTL oferese ba kliente sira hodi asesu ba produtu no servisu banku nian hanesan kalkulasaun kréditu, taxa kambiu, lokalizasaun instalasaun banku nian hanesan Sukursál, Ajénsia, Unidade, ATMs no Ajente Banku sira no sei atualiza informasaun banku nian ba públiku.

Nia hatutan, banku dezenvolve site ne’e ho intensaun atu fasilita atendimentu ba kliente sira, no ami espera ho lansamentu ne’e bele ajuda no responde konsumidór sira nia reklamasaun no site refere bele asesu liu-hosi www.bnctl.tl plataforma ne’e kompativel iha dispózitivu móvel sira hanesan telemovel android, IOS, inklui iha komputadór no permite asesu iha kualker fatin no kualker tempu.

Eventu lansamentu ne’e hetan partisipasaun hosi Konsellu Administrasaun, Komisaun Ezekutiva, Jerentes, Xefe Divizaun, Xefe Unidade Espesializada, Xefe Departamentu, funsionáriu BNCTL no públiku sira hotu.