Viqueque, 15 Outubru 2025 – Banco Nacional de Comercio de Timor-Leste (BNCTL), S.A reforsa nia komprimisu ba inkluzaun finanseira iha baze hodi realiza sesaun diseminasaun konaba produtu no servisu banku nian ba funsionarius munisipais, estudantes no komunidade iha munisipiu Viqueque.

 

Atividade sosializasaun ne’ebé realiza hosi Divizaun Planu Negósiu no Komersializasaun (PNK) ne’e ho objetivu hodi hakbesik aan ba komunidade Viqueque atu fahe informasaun konaba sistema finanseiru, promove literasia bankária tipu konta iha BNCTL, depózitu, kréditu, transferénsias, servisus dijitais (Internet/Mobile Bangking, SMSAlert), Ajente Banku, kartaun foun UnionPay International (UPI) no seluk tan.

 

Entretantu, iha atividade ne’e partisipante sira hatudu interese no ativu hodi koloka kestoens konaba asesu ba kréditu, fasilidade konta iha BNCTL, uza aplikasaun dijitais, inklui preokupasaun ne’ebé sira enfrenta. Iha sorin seluk, ekipa mos halo kedas atendimentu ba partisipante sira ne’ebé hakarak rejista ba Internet/Mobile Banking.

 

Sosializasaun ne’e hola parte iha planu estratéjiku BNCTL nian hodi reforsa konfiansa komunidade iha sistema finanseiru nasional no garante Timor oan hotu asesu ba servisu bankárius ne’ebé seguru, modernu no asesível.