Banco Nacional de Comércio de Timor-Leste (BNCTL) S.A, ofisialmente lansa karteira dijitál (E-WALLET) ho naran “KOHE BNCTL” iha ámbitu selebrasaun aniversáriu BNCTL ba da-XIV. KOHE BNCTL hanesan aplikasaun dijital ne’ebé permite konsumidor sira halo tranzasaun lais, fasil, seguru no modernu liu, liu-hosi dispozitivu telemóvel.

Iha intervensaun, Prezidente Komisaun Ezekutiva BNCTL, Sr. Marcelo da Cruz Carvalho informa inisiativa ne’e fó kontribuisaun importante ba promosaun inkluzaun finanseira, aumenta asesu servisu bankáriu ba komunidade no sustenta modernizasaun sistema pagamentu dijitál finanseira iha Timor-Leste.

KOHE BNCTL hetan inspirasaun hosi liafuan lokál “KOHE” ne’ebé iha signifikadu profundu iha kultura Timor-Leste. KOHE simboliza rai osan, sustentabilidade no produtividade, nia remata.

Hanesan agradesimentu ba loron aniversáriu, nune’e estrutura no funsionarius BNCTL hamutuk partisipa selebrasaun misa iha igreja São Sebastiaun, iha Bidau Mota Klaran no fó apoiu finanseiru ba inan faluk ho oan ki’ak ne’ebé moris ho kondisaun la favoravel iha aldeia Halidolar, suku Hera, Postu Administrativu Cristo Rei, Díli.

Eventu selebrasaun ne’e hetan partisipasaun hosi Vise-Primeiru-Ministru Interinu, Sua Exelénsia Ministru Transporte no Komunikasaun, Sr. Miguel Marques G. Manetelu, Exelentísimu Governador Banco Central de Timor-Leste (BCTL), Sr. Helder Lopes, Vise Ministra Soliedariedade Sosial no Inkluzaun (MSSI), Sra. Céu Brites, Exelentísimu Sekretáriu Estadu Komunikasaun Sosial, Sr. Expedito Dias Ximenes, Konsellu Fiskal BNCTL, Konsellu Administrasaun BNCTL, Komisaun Ezekutiva BNCTL, jerentes, xefe departamentus no funsionarius hotu.