Maubisse, 27 Fevereiru 2026 – Banco Nacional de Comércio de Timor-Leste (BNCTL), S.A, reprezenta hosi Prezidente Komisaun Ezekutiva, Sr. Marcelo da Cruz Carvalho, Sesta-Feira ne’e, halo lansamentu fatuk dahuluk ba konstrusaun “UMA ESPERANSA”, iha suku Fatubesi, aldeia Hohulo.

Iha intervensaun, Prezidente Komisaun Ezekutiva informa, lansamentu ba konstrusaun ne’e hola parte iha programa Corporate Social Responsibility (CSR) ne’ebé banku prevé kada tinan ho hanoin ida atu tulun maluk sira ne’ebé nesesita tebes apoiu.

Sentidu hosi “UMA ESPERANSA” ne’e reflete katak esperansa mak baze ba dezenvolvimentu, ba ema, ba famÍlia no ba nasaun. Inisiativa ne’e demostra BNCTL la’os de’it instituisaun finanseira, maibé parseiru sosial ne’ebé kompremetidu ba moris di’ak komunidade Timor oan nian.

Iha fatin seluk, reprezentante Prezidente Autoridade Munisipiu Ainaro, Xefe Planeamentu agradese ba parte BNCTL ne’ebé bele fó ona apoiu ba famÍlia ida ne’e hodi promove inkluzaun finanseira, dezenvolvimentu ekonomia no melloria kondisaun moris populasaun nian.

Serimónia lansamentu ne’e hetan partisipasaun hosi autoridade lokal suku Fatubesi, reprezentante PNTL Munisipiu Ainaro, komunidade no ekipa téknika BNCTL.