Banco Nacional de Comércio de Timor-Leste (BNCTL), S.A, liuhosi divizaun Planu Negósiu no Komersializasaun (PNK), iha loron Kinta-Feira, 30 Outubru hala’o sosializasaun konaba produtu no servisu bankáriu ba funsionariu sira iha munisipiu Ermera.

 

Objetivu hosi atividade ne’e atu partilla informasaun ligadu ho produtu banku nian hanesan kréditu, depózitu, tipu konta no servisu dijitál hanesan Internet/Mobile Banking, SMS Alert, servisu movel, servisu remitensia, ajente banku, servisu sosiais no seluk tan.

 

Iha intervensaun, Prezidente Autoridade Munisípiu Ermera, Sr. José Martinho dos Santos Soares agradese ba BNCTL ho ekipa ne’ebé ho inisiativa hodi disemina produtu no servisu banku nian ba funsionariu munisipál.

 

Entretantu, iha atividade ne’e partisipante sira hatudu interese no ativu hodi koloka kestoens konaba asesu ba kréditu, fasilidade konta iha BNCTL, uza aplikasaun dijitais, inklui preokupasaun ne’ebé sira enfrenta. Iha sorin seluk, ekipa mos halo kedas atendimentu ba partisipante sira ne’ebé hakarak rejista ba Internet/Mobile Banking.

 

Sosializasaun ne’e hola parte iha planu estratéjiku BNCTL nian hodi reforsa konfiansa komunidade iha sistema finanseiru nasional no garante Timor oan hotu asesu ba servisu bankárius ne’ebé seguru, modernu no asesível.