Díli, 30 Maiu 2025 – Ministériu Juventude, Desportu, Arte no Kultura (MJDAK) hamutuk ho Banco Nacional de Comércio de Timor-Leste, S.A. (BNCTL), asina protokolu kooperasaun hodi apoiu realizasaun Jogus Desportivus CPLP ba da-XII no konférensia Ministrus Juventude no Desportu CPLP 2025 ba da-XIV.

Parseria ne’ebé formaliza entre Ministru Juventude, Desportu, Arte no Kultura (MJDAK), Nelyo Isaac Sarmento no Prezidente Komisaun Ezekutiva BNCTL, Marcelo da Cruz, atu fortalese esforsu organizasaun no promosaun iha eventu importantes komunidade Paízes Língua Portugeza.

Iha ámbitu akordu ida ne’e, BNCTL disponibiliza apoius instituisionais, lojístikus no promosionais esensiál ba konkretizasaun eventu ida ne’e, hodi reafirma kumprimisu ba dezenvolvimentu desportu no juventude Timor-Leste nian.

Hanesan patrosinadór prinsipál, BNCTL seu hetan kategoria platina ba Jogus Desportivus CPLP nian, ho direitu ba vizibilidade marka iha materiais promosionais sira no iha espasu fíziku no dijitais ligadu ho eventu refere. Banku mós sei hetan asesu ba billete iha diferentes modalidade desportivas no konvites ba serimónia ofisiais.

“Parseria ida ne’e reprezenta pasu importante iha mobilizasaun rekursu nasionais ba eventu ho dimensaun internasionál, ne’ebé sei koloka Timor-Leste iha sentru desportu no juventude CPLP”, deklara Marcelo da Cruz Carvalho, Prezidente Komisaun Ezekutiva BNCTL.

Ministru Juventude, Desportu, Arte no Kultura (MJDAK), Nelyo Isaac Sarmento, destaka importánsia kolaborasaun ho setór finanseiru nasional no informa katak “asinatura protokolu ho BNCTL demostra unidade entre instituisoens Timorenses ne’ebé ho misaun hodi projeta Timor-Leste iha espasu luzófono. Apoiu BNCTL ne’e esensial hodi garante susesu jogus no reafirma potensial país hodi simu eventu internasional sira”.

Kolaborasaun entre MJDAK no BNCTL reforsa envolvimentu iha setór finanseiru no dezenvolvimentu desportivu, inklui reforsa kooperasaun rejionál.