Díli, 08 Maiu 2025 – Banku Nasionál Komérsiu Timor-Leste (BNCTL), liu-hosi Divizaun Planu Negósiu no Komersializasaun (PNK) ne’ebé reprezenta hosi Marketing halo sosializasaun ba produtu no servisu BNCTL nian ba kandidatu traballadór Timor oan ho totál ualu nulu resin haat (84) ne’ebé tuir Pre-Departure Briefing (PDB) hodi ba servisu iha Australia.

 

Objetivu hosi atividade ne’e mak atu partilla informasaun kona-ba produtu no servisu banku nian hanesan kréditu no depózitu, loke konta bankária, rejistu servisu dijitál Internet/Mobile Bangking no seluk tan.

 

Iha sorin seluk, atividade ne’e mos atu fó hanoin ba traballadór sira katak bainhira ba servisu iha estranjeiru, bele rai ka depózita osan iha konta BNCTL, atu nune’e iha futuru fila mai Timor-Leste bele jere rasik sira nia osan ho di’ak. Alein halo sosializasaun, ekipa BNCTL apoiu kedas hodi loke konta bankária no rejistu Internet Bangking ba kandidatu traballadór sira.

 

Atividade diseminasaun ne’e rezulta hosi kooperasaun entre Sekretariadu Estadu Formasaun Profisionál no Empregu (SEFOPE) ho BNCTL ne’ebé selebra ona hodi apoia maluk traballadór timor oan sira ne’ebé sei desloka hodi ba servisu iha rai liur.